A Facultade de Relacións Internacionais do campus de Ourense celebrou este venres unha xornada sobre saídas profesionais do seu grao e fíxoo coa satisfacción de poder incluír xa entre as persoas convidadas a unha das súas egresadas, que forma parte da primeira promoción que titulou este centro o pasado curso académico.
O acto contou co apoio do Consello Social da Universidade de Vigo. Na súa apertura, Laura Carballo, decana da facultade, destacou o orgullo que supón para o centro contar xa coa súa primeira promoción (2022-2026) e con egresadas e egresados que xa están comezando a desenvolver a súa carreira profesional tras rematar hai só un par de meses a súa formación na UVigo. Concretamente, a xornada convidou a participar nela a Nieves Bouzas Kabundi, técnica de apoio en proxectos internacionais da consultora ICSEM e titulada desta primeira promoción da Facultade de Relacións Internacionais da UVigo.