A catedrática de Dereito Internacional Privado e decana da facultade de Relacións Internacionais da Universidade de Vigo, Laura Carballo Piñeiro, e o tamén catedrático de Física Aplicada da institución académica viguesa Juan Pou Saracho recibirán as Medallas de Investigación que outorga a Real Academia Galega de Ciencias (RAGC) en recoñecemento as súas traxectorias singulares e consolidadas en investigación, desenvoltas en Galicia, ademais de fomentar a promoción da ciencia e a tecnoloxía galegas.
Carballo e Pou recibirán cadansúa distinción, xunto aos tamén galardoados investigadores da UDC, Nieves Rodríguez Brisaboa, Francisco J. Blanco García e María Carmen Veiga Barbazán, nun acto que se celebrará o 8 de outubro en Santiago de Compostela, co gallo do Día da Ciencia en Galicia.
A Facultade de Relacións Internacionais do campus de Ourense organiza do 26 de marzo ao 25 de abril o II Ciclo de Seminarios Interactivos, que nesta ocasión leva por título e temática Comercio Internacional. Coordinada polo profesor José Ángel Vázquez Barquero, a actividade conta con nove sesións na que representantes de diferentes empresas exporán ao alumnado do centro as súas experiencias comerciais no exterior.
Tal e como sinala a súa decana comisaria, Laura Carballo, a facultade da UVigo “busca formar profesionais polivalentes, capacitados para a análise xeopolítica e xurídica e con liderado para manexar persoal e procesos, habilidades todas necesarias para a xestión de xestionar proxectos e negocios internacionais”. O Grao de Relacións Internacionais que imparte, engade, especialízase na xestión de proxectos e negocios internacionais, tomando como referencia iniciativas privadas supranacionais que contan co respaldo do mundo empresarial mundial, en particular as lideradas polo Project Management Insitute. “A mención en Xestión de proxectos e negocios internacionais do campus de Ourense aliénase coas habilidades e competencias requiridas para obter certificacións emitidas polo PMI e que facilitan o acceso a institucións e empresas cunha dimensión internacional”, sinala.
A Facultade de Relacións Internacionais do campus de Ourense e o seu alumnado sumáronse este luns aos actos organizados estes días co gallo do 8M, Día Internacional da Muller. Así, o centro celebrou a conferencia Unha ollada ás orixes do 8M: Clara Zetkin e Rosa Luxemburg, ofrecida por Almudena Otero e Marta Estévez, da Área de Filoloxía Alemá da Universidade de Vigo.
Antes da celebración do acto, que estivo organizado pola enlace de Igualdade da Facultade de Relacións Internacionais, a catedrática María Lameiras, na entrada do edificio Xurídico-Empresarial, alumnado desta facultade realizou ademais unha intervención reivindicativa sobre a igualdade. Nela, entre outras accións, a alumna Ainhoa García tocou ao violonchelo fragmentos de cancións destacadas no eido feminista, concretamente La puerta violeta, de Rozalén; I will survive, de Gloria Gaynor, e Flowers, de Miley Cyrus.
A Facultade de Relacións Internacionais do campus de Ourense vén de celebrar diferentes actividades que tiveron como obxectivo mellorar as habilidades no eido da comunicación intercultural e o protocolo diplomático do seu alumnado. Trátase dun obradoiro e dunha conferencia que contaron coa asistencia de arredor dunha trintena de persoas cada un deles e que se desenvolveron en diferentes sesións ao longo do último mes.
“Buscando aumentar as capacidades formativas do alumnado, que debe estar preparado para actuar nunha contorna multicultural e nunha sociedade globalizada”, o centro celebrou desde o pasado 24 de setembro o I Obradoiro de Comunicación Intercultural. O evento estivo patrocinado polo Consello Social da Universidade de Vigo. Dividido en varias sesións que remataron o día 17, a actividade tivo como obxectivo “ofertar una formación complementaria á regrada que acentuase as habilidades do alumnado en materia de comunicación intercultural e familiarización co protocolo empresarial e diplomático”.
Moaña acollerá os días 19 e 20 de xullo a primeira edición do Congreso de Xeopolítica Participativa, unha iniciativa impulsada pola Universidade de Vigo, en colaboración coa Universidade de Santiago de Compostela e o Concello moañés, que nace coa vocación de converterse nunha cita anual que cada verán congregue investigadores, estudantes e cidadanía interesados nestas temáticas.
O simposio foi presentado este martes na casa consistorial de Moaña pola alcaldesa, Leticia Santos, o investigador da UVigo Breixo Martins, e o catedrático do Departamento de Xeografía da Universidade de Santiago de Compostela Rubén Lois. Baixo o título A xeopolítica e o sector educativo, “está dirixido a persoal investigador, á cidadanía en xeral e, especialmente, a persoas relacionadas co sistema educativo (pais e nais, as AMPA, profesorado, etc.) xa que o obxectivo é que calquera persoa poida debater e preguntar aos poñentes nun formato próximo e libre”, como explica Breixo Martins.
A Facultade de Relacións Internacionais do campus de Ourense organiza, con motivo do 8 de marzo, Día Internacional da Muller, a xornada International Women’s Day. Invest in women. A temática da actividade, explican desde a súa organización, toma o lema da celebración deste ano elixido polas Nacións Unidas, que é “investir nas mulleres”, e sobre ela céntranse as dúas conferencias propostas na xornada.
A actividade está organizada polo decanato da Facultade de Relacións Internacionais e coordinada pola catedrática María Lameiras, enlace de Igualdade deste centro, e desenvolverase de xeito presencial no edificio Xurídico-Empresarial do campus e de xeito virtual a través do Campus Remoto da UVigo. Está aberta ao público interesado, aínda que está especialmente pensada para o alumnado do centro organizador e os demais membros da comunidade universitaria. A programación deste luns, tras a inauguración a cargo de Laura Carballo, decana do centro, e a propia María Lameiras, contará coa conferencia Was #MeToo good for women? Evidence from Poland, a cargo de Magdalena Grzyb, da Uniwersytet Jagiellonski, de Polonia. Xa o día 7 seguiralle a conferencia Promoting positive masculinities to address violence against women, de Mariano Salazar, do Karolinska Institutet, de Suecia.
A Facultade de Relacións Internacionais do campus de Ourense acolleu este luns a conferencia Panorama xeopolítico 2024, ofrecida por Francisco Dacoba, director xeral do Instituto Español de Estudios Estratégicos. A actividade estivo organizada en colaboración coa Facultade de Historia e coordinada polo profesor de ambos centros Luis Velasco.
Tal e como puido coñecer o alumnado asistente, este Instituto Español de Estudios Estratégicos, encadrado organicamente no Centro Superior de Estudios de la Defensa Nacional, ten asignados dous labores fundamentais: “realizar as análises de carácter estratéxico necesarias para asesorar ás autoridades do Ministerio de Defensa en materias relativas á seguridade e á defensa e, complementariamente e como consecuencia do anterior, o de contribuír a manter informada á sociedade española de canto incumbe á preservación das súas liberdades, do seu benestar e, en última instancia, do seu estado de dereito”. O relator amosou a súa satisfacción por ofrecer esta conferencia sobre xeopolítica ante alumnado universitario, neste caso especificamente de Relacións Internacionais.
O pasado curso académico arrancou no campus de Ourense a Facultade de Relacións Internacionais e na actualidade son arredor de medio centenar de estudantes, maioritariamente mulleres, as que estudan nela o Grao Interuniversitario de Relacións Internacionais. Co obxectivo de que as dúas promocións que xa se forman nas súas aulas (primerio e segundo curso) comecen a albiscar cal pode ser o seu futuro laboral, o centro celebrou este venres unhas xornadas sobre as saídas profesionais desta titulación. A actividade tamén se transmitiu a través do Campus Remoto da UVigo para que as dúas promocións homólogas que están a realizar o grao no campus de Ferrol, da Universidade da Coruña, puidesen seguir tamén as charlas.
A xornada, apoiada polo Consello Social da Universidade de Vigo e presentada por Laura Carballo, decana desta Facultade de Relacións Internacionais, comezou cunha intervención de Alba Espino, xefa de Área de Representacións Estranxeiras, da Dirección Xeral de Protocolo, Cancillería e Ordes do Ministerio de Asuntos Exteriores e egresada da UVigo. Continuou con charlas de Carolina Diz, asesora técnica en Cooperación para o Desenvolvemento e Acción Humanitaria, da Vicepresidencia Primeira e Consellería de Presidencia, Xustiza e Deportes e Dirección Xeral de Relacións Exteriores e coa UE da Xunta de Galicia; Lorenzo Baladrón, consultor internacional, PMP especialista en proxectos de cooperación delegada Tragsatec, Cooperación Española en El Salvador; Sandra Morales, técnica da Fundación da Universidade de Vigo, e Yolanda Molares, directora de ICSEM-Institute for the Sustainable Growth. A programación completarase o 3 de novembro cunha visita á Confederación Empresarial de Ourense.
O curso académico 2022/2023 xa está en marcha e con el volve o alumnado ás nove facultades e escolas do campus de Ourense. Nel ofértase un total de 19 graos e programas conxuntos e 1015 prazas para o estudantado de novo ingreso, sendo as grandes novidades a estrea dos graos de Intelixencia Artificial e Relacións Internacionais e os mestrados de Intelixencia Artificial e Desafíos das Cidades. Co obxectivo de dar a benvida aos novos alumnos e alumnas do campus de Ourense, este martes a institución académica celebrou unha xornada na que as e os asistentes puideron coñecer de primeira man os servizos e instalacións que teñen á súa disposición na UVigo.
Este acto de benvida celébrase nos tres campus da Universidade de Vigo. O luns tivo lugar en Pontevedra, este martes no pavillón de deportes universitario de Ourense e mañá mércores chegará ao campus de Vigo. Natalia Caparrini, vicerreitora de Estudantado e Empregabilidade, destacou na actividade en Ourense a súa satisfacción porque esta iniciativa recupere “a normalidade” despois da pandemia. “En paralelo ás xornadas que se fan en cada centro ou en cada título, onde se lle conta ao alumnado a parte máis académica”, estas xornadas, dixo a vicerreitora, buscan que as e os estudantes “desde o primeiro día coñezan todo o que lles ofrece a Universidade para que logo eles, pouco a pouco, con esa información, poidan decantarse polos temas que máis lles conveñen ou lles interesen”.